المحاكمه العلنيه لمصر...موضوع مهم جدااااا

السلام عليكم
الموضوع حلو قوى يا بروف و أشكرك بشده انك طرحته للنقاش
انا عن نفسى رديت و كتبت كلام كتير قوى و بعد ما قلت ارسل لقيته راح معرفش ليه
الموضوع فعلا شدنى و كنت احب فعلا اتناقش معاكم فيه بس انا دلوقتى متغاظه و معنديش استعداد اكتب كل ده تانى و كمان تعبت
ان شاء الله هبقى اكتبه تانى بس لحد ما اكتبه هتابع ردودكم و ان شاء الله نلاقى نقاش موضوعى فعلا
سلام

بجد الموضوع ممكن نقول فوق الرائع
انا عايزة اقول حاجة مهمة كلنا نغفلها هو ان مصر ام الدنيا لو لاحظنا الحملات الكتير على مصر هنعرف قد ايه البلاد الاخرى بتحسدنا على بلدنا الجميلة دى
وفعلا زى ماقلت يا هشام البلد ملهاش ذنب فى اللى شعبهابيعملوا احنا لما نقول الحكومة فيه وبيها طيب بالعقل كدا مين اللى رشح الناس اللى فى الحكومة احنا يبقى ماخترناش صح
طيب لما نقف فى طابور العيش وكلنا عايزين نقف فى الاول ونزاحم بعض وممكن نضرب كمان فعلا يا هشام بيحصل مهازل بس احنا السبب
يبقى حكمت المحكمة ببرائة المتهمة مصر وكمان بدفع تعويض لها عما صدر من الاهالى
ياجماعة تنبية
عمرنا ما هنسود العالم واحنا بنتصرف بالشكل دة زمان كان جدودنا هما اسياد العالم بفضل سلوكياتهم وحبهم وانتمائهم لبلدهم
واسفة انى طولت بس الكلام عن مصر مش ممكن يخلص
بجد انا بحب البلد دى حب جنونى حب مش طبيعى لو كلنا حبيناها صدقونى هتفرق كتير

الله __الله عليكى يا دنيا فعلا برنسيسة المنتدى
ايةالكلام الجامد دة ربنا يكرمك ويوفقك بجد انا بس ماتزعلش يا بروف اتاثرت بكلامك ممكن يكون اكتر من الموضوع نفسة
وعايزة اقول حاجة ربنا يكرمنا جميعا ونكون فعلا قد الاسم اللى اطلقناه على نفسنا شباب مصر الجدعان
سلااااااام

متشكر جدا يا شباب علي الردود وعلي الاراء الايجابيه دي

وربنا يقوينا يا رب ونثبت فعلا ان شباب مصر جدعان

وياريت ننشر الفكرة دي لكل اصدقائنا


سلام

الله يخليكى يا انجل ، ربنا يكرمك و يا رب اكون فعلا استحق اللقب اللى أطلقتيه على و اكون دايما عند حسن ظنك بى
و على فكرة احنا قدها ، و ان شاء الله ربنا هيكرمنا و هيوفقنا ؛ لأن الله لا يضيع أجر من أحسن عملا

السلام عليكم

شدني فعلا العنوان وعشان كدة قررت اسجل لاشارك معكم بس اولا لي ملاحظات علي الموضوع وبعض الردود وبعدين ان شاء الله اشارك برأيي

اولا بالنسبة الي اغنية شيرين - مع تحفظي علي انها اغنية وطنية مؤثرة

وديني وربي لكبر وأربي....واعلم ولادي حنيني لبلادي واموت قلبى راضى عليكي يا مصر

فعذرا لان الحنين للبلاد لا يُعلَم وانما هو شئ فطري يوجد لدي اشخاص دون غيرهم ولا يؤثر فيه اي تعليم بدليل من ولدوا وفي افواههم ملاعق من ذهب ونعموا في خيرات هذا البلد ورغم ذلك ليس لديهم اي حنين اليه وآخرون لم يحصلوا حتي علي الفتات من هذا البلد ويقتلهم الحنين اليه فالحنين والانتماء لايمكن اكتسابهم

ثانيا دنيا كلامك صح 100% واتفق معك فيه لان العيب فينا نحن وليس في الارض فعندما عاش عليها المبدعون كانت مصر مبدعة وعندما عاش عليها المفسدون اصبحت مصر فاسدة (نعيب زماننا والعيب فينا ومالزماننا عيب سوانا)


ثالثا dreams maker لايمكن ان نحمل الحكومة او الادارة سلبيتنا فنحن من صنع وادمن السلبية والا فان السارق والمرتشي والقاتل والخائن والعميل يمكنهم ان يحملوا الادارة اللي بتدير الازمة ذنوبهم، كل منا مسئول بشكل او بآخر عما آلت اليه احوال ام الدنيا سواء بالتراخي او التكاسل او وانا مالي مش انا اللي هاصلح الكون او هي جت عليا انا وفوق كل ذلك ببعدنا عن تعاليم ديننا ومكارم الاخلاق


اما بالنسبة لراي المتواضع
فالموضوع كبير ومحتاج جهود متكاتفة من ابناء الوطن اطفاله وشبابه ورجاله وشيوخه انها منظومة متكاملة ولكن اهم شئ فلنبدأ بانفسنا فمصر بريئة من كل ماينسب اليها، اناس مصر الحاليين هم من يجب محاكمتهم
بدأً من
- الطالب الذي لا يستذكر دروسه ويعتمد علي الدروس الخصوصية والملخصات فهو غشاش انما ينجح بمجهود غيره ( ومن غشنا فليس منا )
- العامل او الموظف الذي لا يتقن عمله وعذره في ذلك انه علي قد فلوسهم ونسي (إن الله يحب اذا عمل احدكم عملا ان يتقنه)
- الجار الذي تراه يؤذي جاره رغم انه في المسجد او الكنيسة معظم ايام الاسبوع ( شيزوفرانيا )
- الام التي اهملت ابنائها وتركتهم للشغالات او النوادي ماذا تنتظر منهم - مصطفي مشرفة ولا سميرة موسي ولا احمد زويل اكيد لأ طبعا كبيرهم نانسي عجرم وتامر حسني او عمرو كباب
- الاب الذي ترك ابنائه وهم في امس الحاجة اليه لهثا وراء المال في دول اخري ونسي ان ماسيخسره مقابل ذلك - من انحدار في سلوكيات ابنائه نظرا لغياب القدوة - هو اثمن من كل كنوز الارض مجتمعة لم يعلمهم القناعة بل انحدر معهم الي مستوي كلمة اشمعني - اشمعني صاحبي عنده... اشمعني بنت خالتي جابت الخ... رغم ان كل واحد ظروفه غير الثاني
- المواطن الذي يلقي بالقمامة في الشارع بحجة ان كل الناس بتعمل كده - يعني لو كل الناس راحت النار هيمشي معاهم (منطق غريب)
- سائق السيارة الذي يعتبر ان الشارع ملكا له ولا يبالي بغيره من السيارات او المشاه
- الشاب او الفتاة الذان راحا يقلدا اعدائنا تقليدا اعمي في كل شئ بدأً من الاكل وانتهاءً بالسلوك ونسيا ان لنا دينا وحضارة نفخر بهما من قبل ان يوجد هؤلاء علي ظهر الارض بالاف السنين
الامثله كثيرة وكلنا مشتركون فلنبدا بانفسنا لانه كما نكون يولي الله علينا امثالنا ليديروا الازمة
فان كنا خيرا كانوا خير وان كنا شرا كانوا اشر منا

عذرا للاطاله ولكنك انت ياهشام من نكأ الجراح
وشكرا

عاشقة لتراب مصر

اولا اهلا بيكي معانا في المنتدي


ولا يهمك واحنا محتاجين لمثل هذه الاراء اللي اكيد كلنا هنستفيد منها


ونتمني منك المزيد والمزيد

سلام

اهلا بيكى معانا اريج الورد

انا كمان معاكى بحترم البيت (نعيب زماننا والعيب فينا ومالزماننا عيب سوانا)

شكرا لاهتمامك بالموضوع ومساهمتك معانا ، و يا رب تفضلى فى المنتدى و تشاركى بآرائك الايجابيه فيه دايما ؛ يمكن عن طريقه نقدر نعمل حاجه نثبت بيها اننا كلنا فعلا
عاشقين لتراب مصر

سلام