السلام عليكم ورحمة الله وبركاته
موضوع النهارده أعتقد انه مهم وهو بيقارن أو بيوضح علاقة الشبه بين مصر وعصير الليمون
نعم بتقول ايه؟؟
اللي هو ازاي يعني؟؟
عشان نوصل للعلاقه دي هسأل شوية أسئله
السؤال الأول:
عصير الليمون بيتكون من ايه؟
هاهاهاها
سؤال بسيط واجابته بسيطه:
ميه + سكر + الليمون
تماااااااااااااااااام
مصر بقي هي كمان عامله زي عصير الليمون
ازااااي؟؟!!!
بتتكون من شعب + مجلس شعب + (حكومه & رئيس جمهوريه)
السؤال التاني:
ازاي بقي بنعمل عصير الليمون؟؟
ياااااه بس كدا أبسط واسرع طرقه
اننا بنجيب الميه
وندوب فيها السكر
وبعدين بعصر عليها الليمون
بس لازم ناخد بالنا من حاجه ....الميه لازم تكون ميه كويسه ونضيفه عشان نروي بيها البنجر
او القصب اللي بنجيب منه السكر وكمان شجرة الليمون اللي بناخد منها ثمرة الليمون
بس لو سألت وقلت اشمعني الترتيب ده؟؟ اعتقد انه سؤال صعب كل الناس تجاوب عليه
الا اذا كان دارس او جرب كذا مره وعرف الاجابه
برضو فين العلاقه بين عصير الليمون ومصر؟؟؟
أقولكم
الاجابه هي اننا لو حطينا الليمون قبل السكر وبعدها قعدنا نزود سكر الطعم مش هيتغير وهيفضل طعمه لاذع.......يبقي لازم ندوب السكر في الكوبايه زي ما احنا عايزين عشان طعم الليمون ما يبقاش هو الغالب علي الميه ...يعني السكر بيظبط الليمون وما يخليش الليمون يطغي علي الميه وخدوا بالكم من حاجه تانيه ان لو مفيش سكر الميه مش هتقدر تمنع الليمون من انه يطغي علي طعم الميه ...يعني نقدر نقول ان السكر هو حلقة الوصل بين الميه والليمون بس بضوابط معينه
بس في الآخر بيكون اسمه عصير ليمون يعني معدتش ميه أو سكر اسمه عصير ليمون
يعني نقدر نقول ان الميه والسكر والليمون كلهم بيعبر عنهم حاجه واحده اللي اسمها عصير ليمون
صح كدا
خد بالك كمان
هنستخدم التشبيه ده
الميه >>>> بتقابل >>>> الشعب
السكر>>>> بيقابل >>>> بيقابل مجلس الشعب
الليمون >>>> بيقابل >>>> الحكومه & الرئيس
إحنا كمان الشعب (اللي هو الميه في عصير الليمون) لازم يكون كويس ونضيف وبيحب البلد وبيخاف عليها بجد
وعارف حقوقه وواجباته وبيتكاتف مع بعضه ويقضي علي الاميه والادمان والفقر والفساد ومشكلة الزباله و
العشوائيات......الخ
أينعم مش كل المشكلات هتتحل بس علي الاقل يبقي الشعب رافضها ولما يلاقي في حد بيحل يقف جنبه
مش يقول وانا مالي او يقول انا هستفيد ايه أو يسيبه يشتغل وبلاش يعطله
ومن الشعب الحلو اللي زي الفل ده يطلع منهم ايه؟؟؟؟
مجلس الشعب (اللي هو السكر في عصير الليمون)
وطبعا لو الشعب نضيف وكويس مجلس الشعب اللي جاي اصلا من الشعب النضيف الكويس هيبقي هو كمان كويس ويقدر يمثل الشعب.
وبرضو من الشعب الحلو هيطلع الحكومه والرئيس(اللي هو الليمون) واللي بيبقي الواجهة بتاعت البلد ةاللي بيمثل مصر كلها بين الدول .
هو دا الترتيب اللي المفروض يحصل
الشعب يبقي كويس
يختار مجلس شعب كويس
يسيطر علي الحكومه والرئيس عشان مايطغوش علي الشعب
وبعدها يختار الرئيس والحكومة اللي بدورها هتيجي مع الرئيس اللي الشعب يختاره
اللي انا عايز اقوله وفي ناس كتير بتقوله بس معتقدش ان الكل بينفذه الا من رحم ربي
اننا فعلا فعلا لازم نبطل نتكلم علي الانتخابات
وكل اللي نعمله اننا نصلح نفسنا لأننا كدا بنضيع الفتره اللي قبل الأنتخابات بتاعت مجلس الشعب
واللي المفروض نبدأ نفهم دورنا كويس ونعرف واجبنا ثم واجبنا ثم واجبنا وبعدين ندور علي حقنا .
وبعد كدا يجي دور انتخابات مجلس الشعب وبعدها يجي دور انتخابات الرئاسه.
ولازم نعرف كويس جدا ان انتخابات مجلس الشعب الجديد اهم مليوووون مره من رئيس الجمهوريه
ودا اللي لازم نختاره كويس ونتكلم عنه والرئاسه نسيبها لوقتها
سلاااااااااااااااااااام
